Privacia në Facebook

Shfrytëzuesit e rrjetit online për shoqërim Facebook pa menduar shumë u
japin informatat e tyre private njerëzve tërësisht të panjohur, thuhet
në hulumtimin e kompanisë Sophos.
Gjatë hulumtimit të kompanisë australiane të sigurisë Sophos në të
cilin janë përfshirë 100 përdorues të Facebook janë krijuar dy profile
të rrejshme. Pasi që një grupi të përzgjedhur të përdoruesve nga këto
profile të rrejshme u janë dërguar kërkesat për t’u bërë miq, kërkesat
nga njëri profil është pranuar automatikisht nga 41%, derisa nga tjetri
46%.

Pasi që përdoruesit janë bërë “miq” me profilet e rrejshme të Sophos
tek 89% e përdoruesve u është mundësuar qasja në informatat si data e
lindjes, adresat e postës elektronike, në cilën shkollë kanë shkuar apo
të dhëna tjera të shumta private.

Tek gjysma e përdoruesve kanë qenë të hapura informatat për qytetin apo
lagjen ku jetojnë, e shumë tjera kanë ndarë informatat për miqtë dhe
familjen e tyre.