Kina ndalon faqet private të internetit

Kina ua ka ndaluar personave fizik që të regjistrojnë domene të reja të internetit dhe ka nisur aksion të madh të kontrollimit të miliona paraqitjeve personale në rrjet, në goditjen më të madhe të autoriteteve në vend, shkruan gazeta "The Financial Times".
Nga e hëna, të gjitha ata të cilët duan të regjistrojnë një domen në internet në Kinë duhet të paraqesin edhe lejen për punë dhe të dhënat për kompaninë e tyre. Edhe faqet ekzistuese shumë shpejt do të duhet të rregullojnë letrat e tyre sepse do të mbyllen me veprim të shpejt nëse nuk i përmbushin rregullat e reja.

Ofruesit e shërbimeve të internetit kanë njoftuar se tanimë kanë filluar me revizionin e bazave të klientëve të tyre, për të gjendur “përmbajtje potencialisht të rrezikshme, të paligjshme dhe të dëmshme". Ndryshe, autoritetet përdorin shprehjen “të dëmshme” në të shumtën e rasteve kur bëjnë censurim të interneti në Kinë. Nën të dëmshme nënkuptohet çdo gjë nga pornografia e deri tek aktivizmi politik.

Hapi i ri i kontrollit të internetit, të cilin autoritetet në Kinë po e zbatojnë në disa nivele, ka pasuar pak kohë pas bllokimit të tërësishëm apo të pjesshëm të rrjeteve online për shoqërim si "YouTube", "Facebook" e "Twitter", si dhe versioneve të tyre lokale.