Google paraqet Chrome për Mac e Linux

Tabori i gjigantit të internetit është bukur aktiv dhe pothuajse nuk
kalon asnjë ditë pa na paraqitur ndonjë risi. Kësaj radhe aktiv ka qenë
ekipi për zhvillimin e shfletuesit të internetit Chrome.
Google gjatë ditës së djeshme u ka ofruar pronarëve të kompjuterëve
Linux apo Mac shfletuesin e vet të internetit Chrome. Të dy kategoritë
e shfrytëzuesve edhe deri më tani kanë mundur të përdorin një variant
të këtij shfletuesi të quajtur Chromium, mirëpo më në fund ata mund të
kënaqen në shfletuesin Chrome.

Siç thekson tabori zyrtar i Google, me sukses janë shkruar 60.000
rreshta të kodeve, janë përpunuar 23 versione të mesme të zhvillimit të
shfletuesit, janë zgjidhur 2.713 krimba në këto sisteme operative, e në
zhvillimin e Chrome për Mac e Linux kanë punuar gjithsej 60
bashkëpunëtorë të jashtëm.

Për mundësitë që ofron në Mac, Chrome mund të krahasohet pa problem me
karakteristikat e Safarit, e në Linux gjithashtu tregohet një
konkurrent i denjë për Firefoxin.

Shfrytëzuesit e Linuxit mund të shfrytëzojnë edhe shtojcat për këtë
shfletues, derisa pronarët e Mac për këtë opsion do të duhet të presin
edhe pak.