Laboratorët e Londrës kanë konfirmuar saktësinë e Qendrës Kombëtare të Gripit në Kosovë për A H1N1.Për të bërë një vlerësim profesional dhe shkencor të laboratorëve të Institutit Kombëtar të Shëndetësisë Publike, para disa ditësh, ky Institut me ndihmën e OBSH-së ka dërguar 95 mostra në ritestim në laboratorët referente të OBSH-së në Londër. Është fjala për mostra të rasteve të konfirmuara si pozitive në A H1N1 në Prishtinë, përfshirë këtu edhe mostrat e rasteve që kanë përfunduar me vdekje.
Rezultatet e laboratorit referent të OBSH-së në Londër janë kthyer në Prishtinë dhe ato – sipas njw komunikate pwr media tw Zyrws pwr informim tw Ministrisw sw Shwndetwsisw – “flasin për konfirmimin e plotë të rasteve të diagnostikuara me gripin A H1N1 që kanë pasur përfundim fatal dhe për performancën dhe kualitetin e shkëlqyeshëm të laboratorit të Qendrës Kombëtare të Gripit në diagnostikimin e Gripit A H1N1”.
“Ky rikonfirmim i rezultateve të IKSHP-së me ato të laboratorëve të nivelit më të lartë botëror motivon edhe më tepër punonjësit e IKSHP-së në vazhdimin e diagnostikimit kualitativ me po të njëjtin trend dhe nivel si edhe shtetet më të zhvilluara të botës duke menaxhuar situatën epidemiologjike në nivelin më të lartë profesional dhe shkencor”, thuhet nw komunikatw.
Ministria e Shëndetësisë dhe Instituti Kombëtar i Shëndetësisë Publike më 30 shtator 2009 me mbështetjen e projektit të Bankës Botërore për Pandeminë e Gripit kishin hapur Qendrën Kombëtare të Gripit në të cilën deri sot janë analizuar gjithsej 880 raste të dyshimta në grip prej të cilave janë diagnostikuar 286 raste pozitive në A (H1N1). 11 raste kanë përfunduar me vdekje (exitus letalis), derisa 49 raste janë diagnostikuar si Infleuenza A (Grip sezonal).
Instituti Kombëtar edhe në vitin 2010 do të vazhdojë me të njëjtin ritëm përcjelljen e situatës epidemiologjike të pandemisë së gripit, por edhe në mbikëqyrjen permanente të sëmundjeve ngjitëse në Kosovë, përmes sistemit të mbikëqyrjes dhe hulumtimit aktiv epidemiologjik, duke pasur parasysh rrezikun e paraqitjes eventuale të valës së re të gripit A(H1N1), thuhet nw fund tw komunikatws.